Activities

क्याम्पसप्रमुख थुनिए !!

Fri Aug.10.2012

हेटौँडा, साउन २६ गते ।नवगठित नेकपा–माओवादी समर्थित अखिल नेपाल राष्ट्रिय स्वतन्त्र विद्यार्थी युनियन क्रान्तिकारीले आज मकवानपुर बहुमुखी क्याम्पसको प्रशासन, लेखा र क्याम्पस प्रमुखको कार्यकक्षमा तालाबन्दी गरेका छन् । आफ्ना मागप्रति क्याम्पस प्रशासनले बेवास्था गरेका कारण आफूहरु चरणवद्ध आन्दोलनमा उत्रनुपरेको सो संगठनले जनाएको छ । संगठनले आजै क्याम्पस प्रमुख बच्चुराम अधिकारीलाईसमेत १५ मिनेट उहाँकै कार्यकक्षमा थुनेका थिए । संगठनले गत साउन १३ गते क्याम्पस प्रशासनसँग ६ बुँदे माग पेश गरेको थियो । ती मध्ये ३ बुँदे मागमा क्याम्पस प्रशासन केही लचक देखिएपनि बाँकी ३ बुँदालाई पुरै बेवास्था गरेका कारण आन्दोलनमा उत्रनुपरेको संगठनका संयोजक प्रल्हाद गौतमले बताउनुभयो । संगठनले प्रत्येक संकायमा गरिएको शुल्क वृद्धि खारेज गर्नुपर्ने, क्याम्पसमा भइरहेका राजनीतिक नियुक्ति रद्ध गर्नुपर्ने र क्याम्पस प्राध्यापकको दोहोरो दरबन्दी अन्त्य गरिनुपर्ने भनी राखेको मागमा क्याम्पस प्रशासन असहमत भएको हो । क्रान्तिकारी इकाई कमिटीले क्याम्पसको क्याम्पससभा हिजो बिथोल्न खोजेपनि ब्यवस्थापनले क्याम्पससभा सम्पन्न गरेको थियो । उनीहरुले क्याम्पसमा ढुंगा प्रहार गरी झ्यालका केही सिसासमेत फुटाइदिएका छन् । गौतमले माग पूरा गरी कार्यान्वयन चरणमा पुगेपछि आन्दोलन फिर्ता लिने बताउनुभयो । आन्दोलनका क्रममा क्याम्पसको पठनपाठन र जारी परीक्षामा भने कुनै अवरोध नगरिने गौतमले बताउनुभयो ।